Gedichte

Zoicha dr Zeit

Dr „Röhrende Hirsch“ im Wohnzimmer

war in frühere Zeita immer

a Symbol für Männlichkeit.

Aber in dr heutiga Zeit

gilt der als völlig antiquiert.

Wia manches halt an Wert verliert,

wenn ma damit it punkta ka.

Dr Kinderzahl sieht ma des a:

Vorbei dia Zeita, wo a Frau ständig putzend

Nochwuchs wirft und den im Dutzend.

Trieba vom Karrieredenka

will se jetzt au d Geschichte lenka

z.B. als Kanzlerin dr Republik.

Do führt wohl au koin Weag meh zrick.

Dr Frau gfallt ihra neie Roll.

Dr Ma frogt sich, was er jetzt soll.

Selbst d Befruchtung erfolgt mehr und mehr

übern Samabankverkehr.

Au wenn dr Gatte selber könnt,

sagt sei Gattin, dia verwöhnt:

„Sorry, du,

unsra Nochwuchs braucht en höhera IQ,

als du den selber biata kasch.

Erspar de Kindr dia Blamasch!“

Langsam dämmrets dem Guata au,

willsch heutzdag punkta bei deira Frau,

stohsch, damit du duldet wirsch,

am beschta in d Küche als „Rührender Hirsch“.

                                    © 2015 Siege Schock

Die Liebe an und pfirsich

D Mutter liebt am Kind an sich

sei Haut so woich wia en Pfirsich.

Und d Liebe dia isch it bloß guat

zur Aufzucht von dr oigna Bruat.

Dr Christ sein Nächschta lieba soll.

It immer findet der des toll.

Beim Übernächschta klappts, wer woiß?

Wenn der it grad Nero hoißt.

Dr Pedant der liebt s Detail.

Dr Tierfreund suacht beim Tier sei Heil.

Au dr Gourmet mag Viecher gern.

Der halt eaba meh intern.

So mancher der liebt s liabe Geld

am moischta, wenn r s selbr bhält.

Dr Krimileaser liebt dr Mord.

Dr Hooligan der liebt sein Sport.

Narziss liebt sich am moischta selber;

dia andre eher anschtandshälber.

Dr Ödipus der liebt sei Mutter.

Sein Vater aber meuchla tut r.

D Liebe gleicht halt dann und wann

vom Weasa her ra Achterbahn.

Dia moischte wellet trotzdem mitnichta

auf Dauer ganz auf se verzichta.

Liebe find i au grundsätzlich guat,

weil ma so lang nix bledres duat.

[i]

                                      © 2015 Siege Schock